Theocrite, qui est, ὡς ἰδον, ὡς ἐμάνην. C’est à dire, que dés la première fois qu’il vit Cassandre, il devint insensé de son amour. Ce Sonet appartient comme le premier, au pourtrait de sa Dame.
III
Dans les regards de sa jumelle flame
Je vis Amour, qui son arc desbandoit,
Et sus mon cœur le brandon espandoit,
Qui des plus froids les mouelles enflame :
Puis çà puis là près les yeux de ma Dame
Entre cent fleurs un ret d’or me tendoit,
Qui tout doré blondement descendoit
A flots crespuz pour enlasser mon ame.
Qu’eussay-je fait ? L’Archer estoit si doux,
Si doux son feu, si doux l’or de ses nouds,
Qu’en leurs filets encore je m’oublie :
Mais cest oubly ne me travaille point,
Tant doucement le doux Archer me poingt,
Le feu me brusle, et l’or crespe me lie.
Dans les regards.) Il poursuit à raconter comment il fut surpris, disant qu’il vit Amour dans les yeux de Cassandre, desbandant son arc contre luy, espandant ses brandons sur son cœur, et luy tendant un ret d’or pour enlasser son ame, sans qu’il y peust onc résister. Un ret d’or.) Il entend les cheveux de sa Dame dorez, crespelus, et mollement descendans sur les joues. [Tant doucement.) Ainsi Pétrarque, Amor con tal dolcezza m’unge, e punge. 1604].
