E el leſ gardet ſi gins non aſgrune
Troſ la a roſſillon ſoz en la dune
Puis le depart li conſ e la comune
Non at bon cheualer de ſpaigne a rune
Qui nen age ſa part ſenz nule anfrune
Jſt treſaur amaſſerent genz ſarazine
La conteſſe le ſat qui ſen aiſine
Quin refeit bone part gent pauꝑine
E girarz les denierſ depart en emine
Vint mile mars trameſt daur la reine
Ele en donet tauſ mil caſcunſ lencline
E al rei la meitat per quei ſafine
E folche nol deit ginſ fil de roncine
De cent cheuaus fait folcheſ au rei p̃ſent
Anc un de ces non at roncin parent
Ꝑ cen unt aioſtat un parlement
Que uoliunt cechar acordement
Maiſ odinſ le defait e ſei parent
E cil qui ſunt al duc pluſ mal uuellent
Girarz mandet pepin qui od lui uent
La reine el trameſt per rei conſent
E il len duit a rome a ben gant gent
E fant de lui tau ric coronement
Que maiſ denperador nouis tan gent
Romain lont retengut per couinent
Quil porterunt tot ſeignorement
E il garde lonor bien e defent
Per conſeil andicas e bedelun
Quil auant a girart æ a folcon
Quaduient l’apoſtoile en lor reion
Por faire paz de lor e de carlon
Jl i uent uolentiers e ſat li bon
Car parenſ fu girart de par drogon
E carles en creet bien ſon ſermon
Maiſ oudinſ ne le uol ne li felun
Tot li parent teuri ne li baron
Nen ont cure de plait dacordeiſon
Ne negunſ ne ſe mut de ſa maiſon
Altre conſeil a pres li reis molt bon
Apreſ les at mandat per acheiſon
Por faire grant bataille al borgeignon
Donc ſe mouent franceiſ e li breton
E norman e flamenc e braibencon
La reine mandet a roſſilon
Girart quil ſen garnis cum par reiſon
Ꝑ det e ꝑ amor e per ſon don
Eu at trente millers ſenz les folcon
Qui ú naduiſt tauſ uint mile ki furent bon
En la riuere aual ſoz caſtellon
E per plan e per praz de roſſillon
Lai ſunt tendut li trat el pauillon
E li conſ lor a fait grant liuraiſon
