Entros braz ſa muller qui char lo tent
La donne les uaſſauſ ueit burdiſſent
E menbret li de loin nuriment
De girart qui ſolie faire enſement
E ac tal dol el cor par poi ne fent
Laige li chiet des uelz e len deſcent
Sor la barbe girart li uait chaent
E li conſ ſe drecet diſ ſon talent
Donne or ſai ke tes cor uers mei repent
Care ten uaiſ en france ſenz maitenent
Eu te iurerai ſor ſainſ uercent :
Jamaiſ ne me ueiras ne tei parent
Or oi co diſt la donne ſenz de iouent
Ja damlideu no place omnipotent
Seiner per quei parlaz tan malement
Que eu ia uoſ gerpis a mon uiuent
Ne maiſ cau me ſaudrie en foc ardent
E lo conſ la baiſat ſenz meintennent
Seiner ſe mes conſelz en fuſ auiz
Noſ torneſem en france o fuſ nuiriz
Or a uint e douſ anſ que neſ eiſiz
Et eſſez de mau traire roz e fraitiz
E ſi podez trobar lenpereriz
A cui uoſ fuſteſ ia amius pleuiz
Ja non ert tan fel carles ſoſ mariz
Ne uos i quere plai dunt ers gariz
E girarz reſpondet benſ eſ que diz
Eu lai men irai tot ſui garniz
o cons girarz en prent ſon conſel breu
Non laiſerai ꝑ ren ꝑ man non leu
E a la meſſe auie a ſaint andreu
E a preiat lo ſainte damlideu
Reis del cel met en cor au ſeinor meu
Que me pardunt ſa ire el e li ſeu
Ꝑ quen rende maſ terres e mon feu
Poiſ ſe meſ au chemin molt o fai greu
Au digos de la cene ſemblant romeu
Erberiat a orlins chies loſte erueu
Erueus li oſtelers fu ben autis
E apelet girart molt genz li dis
Dum es uos amius de cau pais
Quer annaz a ca cort ſi ſerez mis
E preiaz la reine ke uos ueſtis
Per deu co dis girarz non ſui apris
Seiner dis la conteſſe ſeiaz peruis
E ne uos eſmaiaz du cars amis
Paraulaz o lei per cau ke gis
Lannes annaz lo cons molt a enuis
Entres autres romeus girarz ſaiſis
Atant es aimar clers de paris
E quant il ueit girart fai lun fein ris
Veez uos ceu truant a ceu cap gris
