Or eſt-il que comme le bien n’eſt pas difficile à connoiſtre ; Il nous eſmeut auſſi facilement à l’aimer, & à nous en promettre la poſſeſſion : Ce qui fait dire à ſainct Auguſtin, In Pſal. 104. Que l’amour ſans l’Eſperance, ne peut iamais venir à bout de ſes deſirs.
Quelques autres l’habillent d’vne robe iaune, toute ſemée de fleurs, à cauſe qu’elle reſueille & entretient dans nos ames mille deſirs qui leur plaiſent ; Tout de meſme que l’Aurore, de qui elle porte les couleurs, & à laquelle les Atheniens la comparent, ſe faiſant paroiſtre ſur l’Orizon, renouuelle toutes choſes auecque le iour, & nous fait eſperer de plus en plus, par la diuersité des agreables objets qu’elle preſente à nos yeux, l’adiouſte à cecy, Que de la façon qu’ils en plantent la figure, il ſemble qu’elle marche ſur la pointe des pieds ; par où ils veulent monſtrer ſans doute, Que l’Eſperance n’eſt iamais bien ferme, & que les choſes que nous deſirons, nous ſemblent touſiours plus grandes que celles que nous auons.
Eternité. LIII.
Cette Image de l’Eternité eſt de l’inuention de Monſeigneur Barberiny Florentin, qui dans le Traicté qu’il a fait de l’Amour, la repreſente ſous la figure d’vne belle Dame, de qui les cheueux eſpars & de couleur d’or, luy tombent ſur les epaules, & deſcendent aſſez long.
Auecque cela, des deux coſtez où deuroient eſtre les hanches, prennent racine deux demy Cercles ; qui ſe pliant, l’vn à droit, l’autre à gauche, s’entrerencontrent ſur la teſte de cette Dame auec vne eſgale iuſteſſe, en forme de Cercle. Elle a de plus deux Boules d’or en ſes mains, qu’elle tient hauſſées, & le corps couuert d’vn bel Azur, fermé d’Eſtoilles. Tout cela, ce me ſemble, eſt vn vray ſymbole de l’Eternité ; ſoit que l’on conſidere, ou la figure ronde, qui n’a ny commencement, ny fin, ou la perfection de l’or, qui eſt le plus durable de tous les metaux, ou la couleur azurée repreſentant le Ciel, qui eſt la choſe du monde la moins corruptible.
