Estude. LI.
Par la peinture de ce ieune Homme, qui eſt aſſis, on peut iuger aiſément de ſon inclination à l’Eſtude. Il a le viſage paſle, vn habillement modeſte, vn Liure ouuert, où il eſcrit à la clarté d’vne Lampe, & vn Coq à ſon coſté.
Sa grande ieuneſſe monſtre, Que cét aage robuſte eſt propre à l’Eſtude, pour en ſouffrir la fatigue ; Son viſage paſle, Iuu. Sat. 5
Qu’il faut veiller la nuict, & paſlir ſur un Liure.
Son habit modeſte, Qu’vn homme de Lettres doit aimer la moderation : Le Siege où il eſt aſſis, Que le repos & l’aſſiduité luy ſont neceſſaires. Son attention ſur vn Liure ouuert, Que l’Eſtude eſt vne ardente application à la connoiſſance des choſes. La Plume dont il eſcrt, Qu’il faut que par ſes ouurages il laiſſe, s’il eſt poſſible, vne loüable memoire de ſoy, Perf. Sat. 1.
Son ſçauoir n’eſtant rien, ſi d’autres de le ſçauent.
Par la Lampe allumée, Que les vrays Studieux gaſtent plus d’huile que de vin ; Et par le Coq, Que la Vigilance leur eſt neceſſaire, pour s’acquerir de parfaites notions des arts & des Sciences.
Esperance. LII.
Sa vraye Image eſt celle d’vne ieune Dame, veſtuë de verd, couronnée d’vne Guirlande de Fleurs, & qui tient entre ſes bras vn petit Amour, à qui elle donne la mamelle.
Sa Guirlande de Fleurs eſt vn vray ſymbole de l’Eſperance ; pource, Qu’elles ne paroiſſent iamais ſur l’arbre, qu’en meſme temps elles ne nous facent eſperer du fruict.
Quant à l’Amour qu’elle allaicte, cela veut dire, Que l’vn ſans l’autre peuuent eſtre difficilement de longue durée. Car comme on ne ſouhaite iamais d’auoir du mal, il s’enſuit de là, que l’homme n’aſpire qu’au bien, s’il eſt ainſi que durant ſa vie, il ſe propoſe touſiours pour guides la Nature & la Raiſon.
