Le Liure ouuert, & l’Horloge qu’elle tient d’vne main, enſeignent deux choſes ; L’vne, Que les paroles tissuës, auec art, & animées par la viuacité de l’action, ou miſes par eſcrit, pour le commun bien de la Poſterité, ſont les inſtrumens de l’Eloquence ; L’autre, Qu’il y faut apporter l’ordre requis, & la iuſte meſure du temps, qui donne aux periodes le nombre, au ſtile la grace, & à tout le corps du Diſcours, l’ame de la Perſuaſion.
Pier. Val. lib. 33. Quant à la Foudre, que Pierius luy attribuë, cela ſignifie, Qu’auecque la meſme facilité qu’elle met par terre les plus hautes tours, l’Eloquence abat l’obſtination des ignorans, & ruine de fonds en comble les opinions qu’ils ont baſties ſur de mauuais fondemens.
Errevr. L.
Et Homme qui marche à taſtons, les yeux bandez,
& vn Baſton à la main, eſt vn Symbole de l’Erreur.
Les Stoïciens la definiſſent vn forlignement hors
du chemin ; Comme au contraire, s’y tenir dedans,
ſans s’eſgarer tant ſoit peu, eſt ce qu’on appelle aller droit, &
ne ſe point fouruoyer.
Ainſi pouuons nous bien dire, Qu’en toutes nos actions, ſoit de l’eſprit, ſoit du corps, nous ne faiſons que voyager icy bas, & que cette vie n’eſt qu’vn Pellerinage en terre, d’où nous eſperons d’arriuer au Ciel. Cecy nous eſt enſeigné par l’apparition de Ieſus-Chriſt à ſes Diſciples, en habit de Pellerin ; Ioint que dans le Leuitique, Dieu commande exprés au Peuple d’Israël d’aller touſiours droit, & de ne s’eſgarer iamais du grand chemin.
Par le Bandeau qui aueugle ce Voyageur, il eſt ſignifié, Qu’il n’eſt point d’Erreur où l’Homme ne tombe facilement, depuis que la lumiere de ſon eſprit eſt vne fois obſcurcie par les intereſts du monde, comme par des nuages eſpais ; Et par le Baſton, Que celuy qui ſe laiſſe conduire par la voye du ſens, peut choper à chaque pas, s’il n’a pour fidelles guides les operations de l’Eſprit, & celles de la vraye Raiſon.
