a retrouſſez iuſques au coude, elle empoigne la Foudre ; & que de l’autre elle tient vn Liure ouuert, au deſſus duquel eſt vne Horloge de ſable.
On repreſente l’Eloquence, ieune, belle, & armée, à cauſe qu’elle ne ſe propoſe point d’autre fin que la perſuaſion : Dequoy ne pouuant venir à bout que par le moyen de ſes attraits & de ſes charmes, on luy en met quantité ſur le viſage, pour monſtrer par là, Que les ornemens & les graces des paroles, ſont abſolument neceſſaires à quiconque veut perſuader autruy. Auſſi n’eſtoit-ce que pour cela, qu’anciennement l’on peignoit ieune & agreable le Dieu Mercure pour figurer l’Eloquence, qui peut agreer difficilement, ſi elle n’eſt belle, vigoureuſe, fleurie, & pleine de Majeſté.
La delicateſſe des paroles nous eſt encore denotée par ſes bras nuds. Car ſans les fondemens d’vne ſolide doctrine & d’vn fort raiſonnement l’Eloquence ſeroit deſarmée, & ne pourroit iamais donner dans le but où elle viſe : d’où vient qu’elle meſme & la Perſuaſion, ſont à bon droit appellées les creatures de la Doctrine. Mais pource que les raiſons que produit la Science, ont des difficultez qui empeſchent qu’on ne les entende ſi aiſément ; L’on y adiouſte pour cét effet les ornemens & les graces des paroles, qui les eſclairciſſent, & qui engendrent ſouuent des effects des perſonnes, par le moyen deſquels l’on d’éueloppe les embarras d’vn eſprit deffectueux & groſſier. Pour cette meſme fin encore, ſoit qu’il s’agiſſe, ou d’expliquer par raiſons les matieres difficiles, ou d’eſmouuoir les paſſions de l’ame, ou de tenir en arreſt ſes mouuemens deſreglez ; Il eſt neceſſaire que l’Orateur ſoit ingenieux à couurir ſon Art d’vn agreable meſlange de paroles choiſies & bien rangées. Car quelque endormy que ſoit vn eſprit, elle l’eſueillera ſans doute par la ſubtilité de ſes Argumens, ou l’attirera par la douceur de ſon langage ; iuſques-là meſme, que ſon action & ſes paroles, comme des foudres redoutables eſtonneront les plus audacieux, & leur feront tomber les armes des mains.
Sa Couronne d’or eſt vne marque de ſa grande authorité, par qui elle regne dans le courage des hommes ; eſtant veritable, comme dit Platon, que la dignité de l’Orateur ſe treuue iointe auecque celle des Roys, lors que par elle il perſuade ce qui eſt iuſte, & qu’il l’employe au gouuernement des Eſtats.
