Son habillement noir eſt d’ordinaire vne marque de dueil : Auſſi n’y en a-il point de plus ſemblable à l’obſcurité, ou à la priuation de cette belle lumiere, qui eſt la ſource de noſtre ioye, comme diſoit l’aueugle Tobie, quand il racontoit ſes infortunes à ſon fils.
Le Flambeau eſteint ſignifie, Que noſtre ame, qui n’eſt que feu, ſelon quelques Philoſophes, ou s’eſteint preſque par la violence des douleurs ; ou qu’à tout le moins elle n’eſt pas ſi clair-voyante, qu’elle puiſſe diſcerner en ſes actions ce qui luy eſt le plus propre, & le plus vtile : Outre qu’à vray dire, vn malheureux qui ſe void perſecuté de toutes parts, ne ſe peut mieux comparer qu’à vne torche qu’on vient d’eſteindre. Car alors toute ſa flamme ſe reſout en fumée, comme tout ce qu’il a de vie ne ſert qu’à le tenir en langueur, & à luy rendre plus ſenſible ſon infortune.
Economie. XLVII.
Ette venerable Dame a ſur la teſte vne Couronne
d’Oliuier, en ſa main gauche vn Compas,
en la droite vne Baguette, & à ſon coſté
vn Timon de Nauire.
Comme il eſt certain qu’à la commune felicite de la vie Politique, eſt requiſe l’vnion de pluſieurs Familles, qui viuent ſous vn meſme ordre ; & que pour bien ſe maintenir, chaque Famille a beſoin de loix particulieres, & qui ſoient plus reſſerrées que les generales ; C’eſt à raiſon de cela, que cette conduite, ou ce gouuernement particulier eſt appellé par nous Economie, mot tiré du Grec, pour en rendre l’expression plus forte. Et d’autant qu’il n’y a point de Famille qui ne ſoit compoſée de mary, de femme, de pere, d’enfans, de Maiſtre, & de ſeruiteurs ; tout cela nous eſt aſſez bien demonſtré dans cette Peinture. La Baguette ſignifie l’empire qu’vn Maiſtre a ſur ſes valets : Le Timon, le ſoin qu’vn vray pere a ſur ſes enfans : La Guirlande d’Oliuier, la peine qu’il doit prendre à maintenir la paix dans ſa maiſon ; Et le Compas, la prudence & la moderation dont il doit vſer dans ſon meſnage. Car il faut qu’il meſure ſa deſpence par ſon
