embarras d’eſprit touchant ce qu’on ne ſçait pas, & de corps par conſequent, en matiere d’agir & de trauailler.
On la dépeint ieune, pource qu’en cét aage-là, le peu de connoiſſance que nous auons de la Verité, nous met dans l’incertitude de toutes choſes.
Le Baſton & la Lanterne ſont des symboles de l’Experience & de la Raiſon, par le moyen deſquelles celuy qui doute de ce qu’il doit faire, peut s’arreſter, s’il veut, ou paſſer outre à la faveur de ces deux guides.
Discretion. XLIV.
Ette Dame venerable, & pleine de majeſté,
penche la teſte du coſté gauche, & hauſſe le
bras, comme ſi elle teſmoignoit auoir pitié de
quelqu’vn, ayant vn Plomb en ſa main droite,
& vn Chameau ſur ſon giron.
Le Plomb qu’elle porte, inſtrument aſſez connu dans l’Architecture, le propre duquel eſt de ſeruir de regle au Maſſon, pour prendre les dimenſions d’vn baſtiment, ajuſter les pierres au niueau, & en applanir les inégalitez, ſignifie, Que la vraye Diſcretion s’accomode aux imperfections humaines, ſans que toutefois elle ſe forligne iamais de ce qui eſt iuſte de ſoy ; fondée qu’elle eſt sur l’equité, comme inſeparable d’auec elle.
Outre ce que nous venons de dire, ce n’eſt ſans beaucoup de raiſon que ce qui la rend le plus recommandable, eſt denoté par le Chameau qu’on luy donne. Car à l’exemple de cét animal, qui eſt ſi prudent, qu’il ne porte iamais de fardeau qui ſoit au deſſus de ses forces ; L’homme aduiſé n’entreprend Lib. 6. de ſinod. rien que bien à propos. Auſſi eſt-il vray, dit Iſidore, que l’on doit appeller Vice tout ce qui manque de Diſcretion, & Vertu tout ce qui en abonde.
