artifice, quand elle donne, & ſans eſperance d’autre intereſt que de la ſatisfaction qu’elle a de faire du bien.
Pour la meſme fin elle ouure les bras pour accueillir tout le monde, & reſpand à pleines mains des pieces d’or & des pierreries ; ce qu’elle fait de ſi bonne grace, qu’elle ne daigne pas meſme regarder les effets de ſa largeſſe, & ſe plaiſt à les produire ſans en tirer vanité. Par où, ſi ie ne me trompe, il nous eſt enſeigné, Que la Generoſité doit eſtre nommée par excellence, la Vertu des Prince & des Herôs, pource qu’ils ont dequoy l’exercer, & que les perſonnes de leur naiſſance ſe plaiſent plus incomparablement à donner qu’à receuoir.
Cvriosité. XXXVI.
Elle qui la repreſente a ſur ſa robe quantité d’oreilles
& de grenoüilles, les cheueux heriſſez, des
aiſles au dos, les bras en haut, & la teſte en dehors,
comme ſi elle vouloit guetter de toutes parts.
La Curiosité ſe void icy peinte auecque pluſieurs oreilles, pource que celuy qu’elle poſſede n’eſt iamais ſans vn deſir deſreglé de vouloir ſçauoir plus qu’il ne doit. Ainſi la deſcrit Saint Bernard en ſon Traicté des degrez de la Superbe, où parlant des Moynes curieux, C’en eſt une marque, dit-il, ſi parmy eux tu en vois quelqu’vn qui ayme à courir, & à s’en aller la teſte leuée, ou l’oreille à l’erte.
Les grenoüilles pareillement eſtoient chez les Egyptiens les ſymboles de la Curioſité, à cauſe des grands yeux qu’elles ont ; leſquels, dit Pierius, mis dans vne bourſe de peau de Cerf, auec de la chair de Roſſignol, font l’homme eſueillé, diſpos, gaillard, & prompt à s’enquerir de tout.
Le meſme nous eſt encore demonſtré par ſa teſte à l’eſvent, par ſes cheueux qui ſe heriſſent, par ſes bras hauſſez, & par la viteſſe de ſes aiſles, qui teſmoignent qu’elle ne fait qu’aller & venir, pour voir & fureter ça & là, ce qui ſe dit, & qui ſe paſſe ; eſtant ſi amoureuſe des nouueautez, que plus elle en ſçait, & plus elle en veut apprendre.
