plaiſant d’eſtre ſeul, qu’il eſt bon & agreable de voir des hommes qui uiuent en freres par la conuerſation qu’ils ont enſemble.
Correction. XXXIV.
Est la figure d’vne Vieille melancolique, qui ſur
vn banc où elle est aſſiſe, tient de la main gauche
vn foüet, & de la droite vne plume, dont elle corrige
vn Liure.
Elle eſt peinte Vieille & deſplaiſante, pour faire voir que comme la Correction eſt vn acte de prudence en celuy qui la fait ; Auſſi eſt-elle vn ſujet de meſcontentement à celuy qui la reçoit : car à moins que d’auoir vne bien haute vertu, il eſt difficile à vn eſprit, quelque doux & ſouple qu’il ſoit, de mortifier l’amour de ſoy-meſme iuſques à ce point, que de voir ſans deſplaiſir paſſer par la lime ſes propres ouurages, & mutiler les membres d’vn corps qu’il conſidere comme ſa creature, bien que toutefois cela ne ſe face que pour luy donner vne meilleure forme.
Pour cette meſme raiſon elle eſt peinte le foüet en vne main, & la plume en l’autre ; pource qu’à le prendre en general, on n’vſe ordinairement de correction qu’aux manquemens que font les hommes, ou dans la voye de l’action, ou dans celle de la contemplation.
Covrtoisie. XXXV.
A bonne-mine, & la majeſté de cette Dame, en qui
les dons du corps, de l’ame, & de la fortune s’accordent
enſemble par vne merueille extraordinaire,
monſtrent aux moins clair-voyans combien puiſſant
eſt l’Empire de la Courtoiſie, ou de la Generoſité.
La Couronne & le Manteau Royal qu’elle porte ſemé d’hermines, ſont les precieuſes marques de ſa grandeur & de ſa magnificence.
Elle eſt veſtuë de blanc, pour faire voir que comme cette couleur eſt ſimple, nette & ſans fard, elle de meſme eſt ſans
