Il ſe void vne ancienne Medaille de l’Empereur Nerua, où l’vnion des Armées eſt repreſentée par vne Femme, qui ſouſtiend du bras droit vne proüe de Nauire, & vne Enſeigne de guerre, où ſont enlacées deux mains l’vne dans l’autre, auecque ce mot Concordia exercitvvm.
I’obmetz qu’en d’autres Medailles, pour monſtrer l’vion des volontez entre pluſieurs, on luy fait tenir d’vne main deux Cornes d’Abondance jointes enſemble, & de l’autre vn Vaſe plein de feu. Ce qui ſignifie, Que la Concorde naiſt de l’amour mutuelle, qui ſe compare à bon droit au feu materiel, pour eſtre vn effet de la chaleur interieure de l’ame.
Quelques-vns ont adjouſté aux Cornes d’Abondance des Pommes de Grenade, comme il ſe remarque en pluſieurs Medailles de Fauſtine ; & d’autres des Corneilles, à la loüange deſquelles on peut dire auec Alciat,
Qu’à leur fidelité leur amour eſt unie.
Et comme les Grenades ſont compoſées de pluſieurs grains attachez ensemble ; la Concorde de tout de meſme ſe forme d’vne eſgale conjoncture d’intentions & de volontez vnies.
Il ne faut pas oublier icy, que lors qu’elle eſt arriuée au point d’eſtre inuincible, elle nous eſt figurée par vn Geryon armé, qui a trois viſages, vne couronne d’or ſur la teſte, ſix bras, & autant de jambes ; outre qu’auecque trois de ſes mains il tient vne Lance, vne Eſpée nuë, & vn Sceptre ; & qu’il appuye les trois autres sur vn Eſcu. Cela neantmoins ne doit point s’entendre de ce fabuleux Geryon, qui eu trois corps, à ce qu’on dit, & qui fut mis à mort par Hercule ; mais bien de trois freres ainſi appellez, & qui n’eſtoient qu’vne meſme choſe, pour la bonne intelligence où ils viuoient enſemble.
Confiance. XXVIII.
Il ſeroit difficile d’en faire vn Tableau plus naturel que celuy-cy, repreſentant vne Femme qui regarde fixement vn Nauire, & qui le ſouſtient des deux mains.
Comme la Confiance preſuppoſe la connoiſſance de quelque danger prochain, & le moyen de l’éuiter, qui ſont deux qualitez ſans leſquelles elle changeroit ſon eſtre & ſon nom. C’eſt à raiſon de cela qu’elle eſt peinte auec vn vaiſſeau entre
