bon droit le ſymbole ; pource qu’ayant vne fois perdu ſa compagne, il n’en veut point auoir d’autre, & qu’il paſſe le reſte de ſa vie dans vne ſolitude continuelle.
Celerité, ou vitesse. XXVI.
La deſcription de cette Peinture eſt tirée de Pierius en ſes Figures Hieroglyphiques, où il dépeint la Viteſſe telle qu’on la void icy ; à ſçauoir vn foudre à la main, vn Eſperuier prés de ſa teſte, & vn Dauphin à ſes pieds. Dequoy ie ne m’amuſeray point à rendre d’autres raiſons, que les ſeuls effets de l’experience, qui nous monſtre l’extreme promptitude de ces trois choſes : Car il eſt certain qu’apres celle de la foudre, qui n’eſt pas imaginable, il n’eſt point d’oyſeau en l’air qui eſgale le vol de l’Eſpervuier, ny point de poiſſon dans l’eau qui nage ſi viſte que le Dauphin.
Concorde. XXVII.
C’est vne ieune Fille veſtue à l’antique, & couronnée d’vne Guirlande de fleurs & de fruicts. De la main droite elle ſouſtient vn baſſin auec vn cœur au dedans, & de la gauche vn faiſceau de verges.
La Concorde, qui ne ſe peut mieux definir, Qu’vne mutuelle vnion de volontez entre pluſieurs, marque l’abondance de toutes choſes par ſa Guirlande de fleurs & de fruicts. Elle eſt veſtuë à l’antique, pource qu’en effet dans la nature des choſes, il n’y a rien de ſi ancien qu’elle-meſme. Auſſi eſt-il vray que les Poëtes luy donnent la gloire d’auoir ſçeu démeſler le Chaos, auant que le monde en fuſt tiré.
La cœur qu’elle porte, qui ſe tient ferme deſſus ſa poitrine, ſignifie que les intentions des gens paiſibles ne chancellent iamais, & qu’en leur aſſiette elles ſont ineſbranlables.
Le meſme eſt repreſenté par le faiſceau de verges, chacune deſquelles eſt foible de ſoy, mais toutes enſemble ſont grandement fortes : à raiſon dequoy Salomon dit, Qu’un triple Cordon ſe rompt difficilement, & l’Hiſtorien Saluſte, Que par la Concorde les petites choſes s’accroiſſent, comme au contraire par le diſcord les plus grandes s’aneantiſſent.
