au dos, le viſage couuert d’vn voile tranſparent, & vne robe eſclatante, & fort deliée.
On la peint belle, pource qu’elle eſt faite à l’image de Dieu ſon Createur, ſource inepuiſable de beauté, de grace, & de perfection.
Le voile qu’on luy met ſur le viſage, nous fait remarquer Lib. def. an. auecque ſainct Augustin, Qu’elle eſt vne ſubſtance inuiſible aux yeux humains, & vne forme ſubſtantielle du corps, où elle ne paroiſt point, & ne ſe comprend que par certaines actions exterieures.
L’eſclat de ſa robe eſt vne marque de la grande pureté par qui elle eſt en ſon luſtre, & vn ſigne myſterieux de la perfection de ſon eſſence.
L’Asſtre qui brille deſſus ſa teſte ſignifie ſon immortalité, que les Egyptiens ſouloient dépeindre par vne Eſtoile, comme Lib. 44. ſe void dans Pierius en ſes Figures Hieroglifiques.
Quant à ſes aiſles, il n’y a celuy qui ne les prenne auecque raiſon pour des effets de ſa viſteſſe incroyable dans les fonctions ſpirituelles, & qui par elles-meſme n’entende ſes deux plus nobles puiſſances, qui font l’Entendement & la Volonté.
Art. XII.
N le repreſente par vne Femme agreable, qui paroiſt
ingenieuſe à ſa mine, & qui eſt veſtuë d’vne
robe verte. Elle tient en ſa main droite trois ſortes
d’outils, qui ſont vn marteau, vn burin, & vn pinceau ;
& s’appuye de la gauche contre vn pieu enfoncé dans la
terre, ſeruant d’eſtançon à vne ieune plante, qui l’enuironne
depuis le bas iuſques en haut.
L’agréement qui ſe remarque dans le viſage de cette Femme, monſtre aſſez combien charmantes ſont les merueilles de l’Art, & ce que peut vn excellent ouurage ; ſoit pour attirer les yeux d’vn chacun, ſoit pour mettre ſon Autheur dans l’approbation & dans l’eſtime de tout le monde.
Sa robe de couleur verte, ſignifie, Qu’en quelque profeſſion que ce ſoit, les meilleurs Ouuriers ne s’eſtudient à perfection-
