enſemble, ordonna pour cét effet. Qu’on n’euſt à grauer ſur les tombeaux les noms d’aucuns Citoyens, que de ceux-là ſeulement qui ſeroient morts pour la defence de leur païs : Ce qu’il fiſt ſans doute, pour apprendre aux autres à les imiter ; comme s’il euſt voulu dire, que dans vn Eſtat bien policé, les valeureux & fidelles Compatriotes eſtoient ſeuls dignes de la memoire des hommes.
Par ces exemples il eſt aiſé de iuger, que l’habit de ſoldat eſt fort conuenable au bon Citoyen, puiſque pour defendre le lieu de ſa naiſſance, il fait touſiours gloire de mourir courageuſement, & les armes à la main. Cette vérité ne ſe peut cacher, eſtant ſi viſible dans l’Hiſtoire ; où tant que les belles actions auront lieu, on remarquera par deſſus les plus grands Noms de ces braues Romains, Decius, Horace, Fabius, & ainſi des autres ; Et parmy les Grecs celuy de Grillus, fils de Xenophon, Philoſophe Athenien, qui durant vn Sacrifice, où il preſidoit, ayant appris que ce valeureux ieune homme qu’il croyoit luy deuoir ſuruiure, eſtoit mort en combattant pour ſon païs, ſe remit à l’heure meſme la Couronne ſur la teſte, & ſe tournant vers le meſſager qui luy auoit apporté de ſi funeſtes nouuelles : Voilà, dit-il, mes vœux exaucez : Ie viens d’obtenir ce que i’ay touſiours demandé aux Dieux, à ſçauoir qu’ils me donnaſſent vn fils qui mouruſt pour ſa Patrie, & non qui veſcuſt de longues années, veu qu’on ne ſçait s’il est bon ou mauuais de viure long-temps.
Ame bien-heureuse. XI.
Ncore que l’Ame, comme diſent les Theologiens,
n’ait rien de corporel, & qu’elle ſoit vne ſubſtance
immortelle, l’homme neantmoins attaché
aux ſens du corps, ſe la figure en l’imagination le
mieux qu’il la peut comprendre, & non autrement qu’on a de
couſtume de repreſenter Dieu & les Anges. Il ne faut donc pas
trouuer eſtrange, ſi pour en laiſſer à l’eſprit vne veritable idée,
nous an faiſons ainſi la peinture.
C’eſt vne ieune Fille, en qui la grace & la beauté ſont également jointes enſemble. Elle a vne Eſtoile ſur la teſte, des aiſles
