Indvstrie.
Lle ſe donne à connoiſtre icy par l’Image d’vne
Femme, qui de la main droite tient vn Sceptre, au
bout duquel ſe void vne main ouuerte, & vn œil au
milieu.
Le Sceptre eſt vne marque de grandeur & de promptitude, comme la main en eſt vne autre d’induſtrie & d’adreſſe ; Ce qui ſignifie qu’il n’appartient qu’aux Souuerains de reſueiller l’induſtrie de leurs Sujets, en leur donnant dequoy ſubſiſter par leur generoſité ; ce qu’ils peuuent faire quand il leur plaiſt, & par ce moyen mettre en credit les Arts et les Sciences.
La main qui aboutit à vn Sceptre, eſt encore, ſelon Artemidore, vn myſterieux ſymbole de l’induſtrie humaine ; eſtant veritable que c’eſt par elle-meſme qu’on vient à bout de la pluſpart des Arts : à raiſon dequoy elle eſt à bon droit appellée par Ariſtote l’Inſtrument des Inſtrumens.
Pour ce qui eſt de l’œil, ie croy qu’il eſt icy mis pour donner à entendre que c’eſt luy principalement qui preſide à l’Induſtrie de tous les Ouuriers, & qui leur guide la main.
Consideration.
Lle a pour Embleme vne ieune Femme, qui de la
main droite tient vn Compas, & de la gauche vne
Regle ; Outre qu’en l’vn de ſes coſtez ſe void vne
Gruë en l’air, tenant vn caillou en l’vn de ſes pieds.
La Regle & le Compas qu’on luy donne, ſignifient que comme par le moyen de cés Inſtrumẽs les excellens Maiſtres font auecque iuſteſſe l’ouurage dont ils ſe ſont formez l’idée dans leur eſprit ; ainſi par les bons exemples & les inſtructions ſalutaires on arriue droit à la vraye fin que l’on s’eſt propoſée.
De cette conſideration, ou ſi vous voulez de cette prudence dont nous entendons parler icy, la Gruë eſt le vray embleme, rapporté par Alciat par des Vers ainſi traduits.
Pour n’eſleuer ſon vol ny trop haut ny trop bas,
La Gruë a des caillous qu’en ſes pieds elle porte ;
Et par ce contre-poids elle ſe rend plus forte,
Pour s’empeſcher de choir en bas.
