Astrologie.
Ette Reyne des belles connoiſſances, couronnée
d’Eſtoilles, & qui en a ſa Robe toute ſemée, n’a pas
ſans raiſon vn Soleil deuãt elle, vn Sceptre en l’vne
de ſes mains, vn Globe celeſte en l’autre, & vne
Aigle a ſes pieds, pour monſtrer qu’elle a touſiours les yeux fixes
à conſiderer le cours des Aſtres, dont elle fait toute ſon eſtude, en la recherche des plus curieux & des plus nobles ſecrets
qui dépendent de leurs influences.
Cosmographie.
A Coſmographie, ainſi appellée, pour ce qu’elle
ſe propoſe pour but la deſcription du monde, a
pour ſymbole vne vieille Femme, veſtuë d’vne
Robe bleuë, ſemée d’Eſtoilles, ayant d’vn coſté
le Globe du Ciel, de l’autre celuy de la Terre, &
en ſes mains deux differens Inſtrumens de Mathematique,
dont le principal eſt vne Aſtrolabe.
On la peint âgée auec beaucoup de raiſon, pour auoir pris ſon origine dés la création du monde.
Quant à ſa Robe bleuë pleine d’Eſtoilles, & aux Inſtrumens qu’elle tient en ſes mains ; cela veut dire qu’elle eſt egalement attentiue à conſiderer le Ciel & la Terre. A raiſon dequoy elle eſt plantée fort à propos entre ces deux Globes, en action de prendre les interualles & les diſtances de l’vn & de l’autre.
