fortifier, il n’y doit rien auoir qui ſente la molleſſe, & que tous ceux qui s’en meſlent ſe doiuent monſtrer inuincibles à la fatigue.
Par ſon habit de pluſieurs couleurs s’entendent proprement les diuerſes inuentions qui ſont requiſes pour venir à bout des fortifications de la guerre.
On luy donne de plus vne chaiſne d’or où pend vn precieux diamant, & ce n’eſt pas ſans vne grande raiſon : Car comme l’Or eſt le plus noble de tous les metaux, l’Architecture de meſme eſt le plus illuſtre de tous les trauaux militaires. Surquoy l’on peut dire encore, que comme il n’eſt point de pierre precieuſe qui eſgale en force & en beauté le Diamant ; ainſi l’induſtrie eſt le plus noble ioyau du Prince, puis qu’elle le met à couuert des coups de ſes ennemis.
Elle tient en main vne Bouſſole, dautant que cét inſtrument de Mathematique eſt grandement propre à tirer des plans.
Pour ce qui eſt du Tableau, ſur lequel vne Arondelle eſt perchée, cela ſignifie que lors que l’on entreprend de baſtir vne fortereſſe, il en faut bien conſiderer l’aſſiette, & imiter l’Arondelle, laquelle, au rapport de Pierius, par la merueilleuſe ſtructure de ſon nid, eſt vne figure hieroglyfique des baſtimens les mieux faits.
I’obmets que le Hoyau & le Pic ſont mis à ſes pieds, pour eſtre les inſtrumens les plus neceſſaires à fortifier vn camp ; ſoit qu’il faille faire des foſſez & des tranchées, ou remuer la terre, & creuſer des fondemens, pour y baſtir deſſus.
Altimetrie.
N la repreſente icy par vne ieune Fille, qui tient vn
quarré Geometrique, dont elle ſe ſert à prendre la
hauteur d’vne tour.
Elle eſt peinte ieune, pource qu’eſtant Fille de la Geometrie ; pour ne degenerer des qualitez de ſa mere, elle obſerue ponctuellement toutes les dimenſions qu’elle luy a monſtrées, & tient pour cét effect le quarré Geometrique, comme vn Inſtrument tout à fait conuenable à ſon deſſein.
