Vsvre.
Lle eſt aſſez bien repreſentée par vne Femme ſongearde,
qui d’vne main conte de l’Argent, & tient de
l’autre vne Coupe, d’où pendent des Chaiſnes d’or &
de perles, pour faire voir par là qu’elle ne preſte iamais que
ſous de bons gages, & ſans eſtre bien aſſeurée d’vn intereſt extraordinaire ;
En cela d’autant plus blaſmable, qu’elle ſçait bien
que tels gains, comme illicites, ſont defendus tous les iours
par les loix Diuines & humaines.
Vengeance.
N vous la depeint en Femme irritée, qui de la main
droite tient vn Poignard tout nud, & ſe mord vn
des doigts de la main gauche, ayant deuant elle vn
Lion, qu’vne Fléche, dont il eſt percé, rend comme
furieux. La Poignard, & l’action de ſe mordre ſont choſes
qui marquent les mauuais deſſeins des hommes vindicatifs.
Quant au Lion, il eſt mis pour vn ſymbole de la Vengeance,
dautant que, ſelon Pierius, il ne manque iamais de la prendre,
s’il peut, de ceux qui luy dreſſent des embuſches, ou qui l’ont
bleſſé, ſans qu’il leur ait fait du mal ; ce que les Egyptiens ont
auſſi voulu donner à conneſtre par leurs Figures hyerogliphes.
Vice.
L eſt icy figuré par vn Hydre à ſept teſtes, ſymbole
des ſept pechez mortels que ce ieune Homme careſſe ;
Auſſi n’eſt-il que trop veritable, qu’en cét âge-là, plus qu’en tout le reſte de noſtre vie, nous courons
apres le Vice, auec tant d’aueuglement, que noſtre perte
eſt ineuitable, ſi la Raison ne s’y oppoſe d’abord, & ne nous
empeſche de tomber dans le precipice.