Tentation.
Lle a pour Embleme vne ieune Femme, qui tient
d’vne main vn Rechaud plein de feu, & de l’autre
vn petit Baſton, dont elle remuë les Charbons, afin
que la flamme s’y prenne : Car dans le ſens où le
mot de Tenter ſe doit prendre icy, il ſignifie proprement Fomenter
vne choſe, qui a d’elle-meſme peu de force, bien qu’elle
ſoit capable d’vn auoir aſſez, & de reduire en acte les diſpoſitions,
ou de l’Eſprit, ou du Corps.
Tardiveté.
L eſt difficile de faire voir vn Embleme de la Tardiueté, plus propre & plus naturel que celuy-cy,
repreſenté par vne Femme couronnée d’vne branche
de Meurier, & montée ſur vne Tortuë, qui eſt
de tous les Animaux celuy qui va le moins viſte ; cõme le Meurier
eſt auſſi le plus tardif de tous les Arbres à porter du fruit.
Tromperie.
Oicy l’Embleme de la Tromperie, ſous la Figure
d’vn monſtrueux Vieillard, le corps duquel
aboutit à deux Queuës de Serpent, enlacées l’vne
dans l’autre. Il tient d’vne main trois Hameçons,
& de l’autre vn Bouquet de Fleurs, d’où ſort vne
Couleuvre, ayant de plus vne Panthere à ſes pieds. Tout cela
demonſtre le naturel du Trompeur, qui ſous vne apparence
humaine, couue vne malice plus contagieuſe mille fois que le
venin d’vn Dragon ; En cela ſemblable à la Panthere, laquelle
cachant la teſte, & ne monſtrant que le dos, attire par la beauté
de ſa peau les autres beſtes ſauuages, ſur qui elle ſe iette à
l’inſtant, afin de les deuorer. A quoy ſe rapporte encore l’Eſcriteau
où ſe liſent ces paroles, Occvltvm visv decvrrite piscis ad hamvm.