Severité.
N la repreſente vieille, couronnée de Laurier, tenant
d’vne main vn Cube percé d’vn Poignard, &
de l’autre vn Sceptre, auec vn Tygre à ſes pieds,
pour monſtrer par là, Que la Seuerité ſied mieux
aux Vieillards qu’aux Ieunes, & particulierement aux Princes
& aux Magiſtrats ; & qu’au milieu des ſecouſſes qu’on luy donne,
elle ſe trouue touſiours debout comme le Cube, ſans que
les menaces ny les Eſpées la puiſſent faire relaſcher tant ſoit
peu de la confiance qu’elle ſe propoſe d’obſeruer en la punition
des Vices.
Simonie.
Lle a ſur la teſte vn Voile noir, dautant que c’eſt
ſa couſtume de couurir de faux pretexte ſes actions
noires, afin de les mieux authoriſer. Auecque cela,
elle porte d’vne main vn petit Temple, au deſſus
duquel ſe voit vne Colombe, vne Bourſe de l’autre, & ces paroles
alentour, Intrvitv pretii. Par où il eſt enſeigné, que
la ſaincte Egliſe eſtant gouuernée par le Sainct Eſprit, c’eſt de
luy que viennent en general tous les biens Eccleſiaſtiques, dont
le Simoniaque taſche de profiter, lors qu’il les met à prix d’argent, & les expoſe en vente auec vne abomination eſtrange.
Svperstition.
Ette Vieille qui a ſur la teſte vne Choüette, vn
Cercle d’Eſtoiles en vne main, en l’autre vne Chandelle allumée, vn Lievre ſous
ſon bras gauche, &
à ſes pieds vn Chat-huant, & vne Corneille, eſt
l’Embleme de la Superſtition, de laquelle toutes ces choſes enſemble
ſont les ſymboles, & particulierement le Lievre, la
Corneille, & le Hibou, qui ſont pris par les anciens Autheurs,
pour des Animaux malencontreux & de mauuais Augure.
