Medisance.
N la peint auec deux Flambeaux allumez, qu’elle
tient en ſes mains, pour donner à conneſtre que le
Médiſant eſt vn vray Boutefeu ; & que fomentant
des haynes ſecrettes, il eſt cauſe que les effets en
deuiennent publics ; & auſſi dangereux que ceux d’vn Brazier
ardant, lors qu’il s’attache à quelque matiere combuſtible,
apres auoir eſté long-temps caché ſous la cendre.
Offence.
L me ſemble qu’elle ſe deſcouure aſſez bien icy en la
perſonne d’vne laide Femme, la Robe de laquelle
eſt toute ſemée de Langues & de Razoirs ; Outre
qu’elle eſt en action de tirer vn Mouſquet, & qu’à
ſes pieds il eſt demonſtré, qu’il n’eſt rien de ſi difforme qu’vne
Offence faite contre l’Equité ; Par les Langues & les Razoirs,
qu’on nuiſt à autruy, non ſeulement par l’action, mais par la
parole encore ; & par le Chien, qui ſe trouue mal d’auoir
attaqué le Porc-Eſpic,
Que tel penſe bleſſer, qui ſe bleſſe ſoy-meſme.
Opinion.
Lle eſt repreſentée par vne Femme aſſez bien veſtuë, qui n’eſt ny belle ny laide ; mais qui paroiſt audacieuſe
à ſa mine, & preſte à s’emporter ſoudainement
à tout ce qu’elle s’imagine ; & voila pourquoy,
ſelon Hypocrate, elle eſt peinte, comme vous voyez icy, auec
des Aiſles au dos & aux deux mains.