Inivstice.
A Robe blanche dont cette Femme eſt couuerte,
toute ſemée de taches, monſtre que l’Injuſtice n’eſt
que corruption, & que ſoüilleure de l’Amen, par le
meſpris qu’elle fait des loix ; & c’eſt pour cela qu’elle
eſt icy peinte foulant aux pieds la Balance. De plus, par le
Crapaut qu’elle porte en vne main, eſt ſignifié le venin dont
elle infecte les bonnes mœurs ; & par l’Eſpée qu’elle tient de
l’autre, le violent effort qu’elle fait, pour ruiner l’Innocence.
Ire.
A Cholere eſt icy depeinte par vne ieune Dame armée
de toutes pieces, & qui porte pour Cimier ſur
ſon Heaume vne teſte de Dragon, vomiſſant des
Flammes, outre qu’elle tient d’vne main vne Eſpée,
& de l’autre vne Torche allumée : Ce qui fait voir aſſez clairement,
ce me ſemble, les effets de cette Paſſion, qui
ſont de
porter partout le fer & la flamme : Auſſi n’eſt-ce pas ſans raiſon
qu’on la definit
Vne Fureur ſanglante, & de peu de durée.
Lvxvre.
Oicy l’Embleme de la Luxure ſous la Figure d’vne
Femme laſciuement habillée ; qui toute penſiue appuye
la teſte ſur ſa main gauche, & tient de la droite
vn Scorpion, ayant a coſté vn Bouc, & vn Sep de Vigne ; Elle
eſt aſſiſe & penſiue, pour monſtrer que l’Oiſiueté, comme dit
le Poëte,
Allume le Flambeau du fils de Cytherée.
Pour ce qui eſt du Scorpion & de la Vigne, l’vn, ſelon Pierius, eſt le Hyerogliphe de la Paillardiſe ; & l’autre pareillement, puis qu’il eſt vray,
Que ſans le Bon Bacchus, Venus eſt touſiours froide.