Idolatrie.
Ette Femme aueugle, & qui ſe tient à genoux
deuant vn Taureau d’airain, à qui elle donne
de l’Encens, repreſente l’Idolatrie : ce qui n’a
pas beſoin d’autre explication, puis qu’il ſe voit
clairement que toutes ces choſes qu’elle fait
ſont des actes d’adoration, que par vn eſtrange aueuglement &
vn crime abominable elle rend aux creatures, au lieu qu’ils ne
ſe doiuent rendre qu’au Createur.
Infamie.
Ovs la voyez icy peinte ſous la Figure d’vne
Femme à demy-nuë, ayant des Aiſles noires, &
vne Trompe dont elle ſonne, auec ce mot eſcrit
ſur la teſte, Tvrpe. Elle a des Aiſles de Corbeau,
pour monſtrer que le bruit des actions qui la noirciſſent,
eſt ſemé de toutes parts dans le monde ; & qu’elle meſme
les publie ſans y penſer. Quant au mot qu’elle porte eſcrit
ſur le front, il veut dire que l’Infamie eſt plus facilement veuë
par autruy, que par ceux qui en ſont couuerts.
Iactance.
Lle porte vne main en l’Air, vne Trompette de
l’autre, & vne Robe toute ſemée de Plumes de
Paon, pour monſtrer que les Ames vaines prennent
plaiſir à publier leurs propres actions ; & que la Superbe eſt inſeparable d’auecque la Vanité. Mais apres tout, ce
n’eſt qu’vne vaine montre, comparable à celle du Paon, Oiſeau
le plus orgueilleux de tous, les plumes duquel ſont eſclattantes
& belles, mais inutiles.
