Fovrberie.
Lle a pour Embleme vne ieune Dame, qui tient entre
les mains vne Botte de Paille allumée ; & ſous la
Robe de laquelle, toute ſemée de Maſques & de Langues,
il ſe deſcouure qu’elle a vne jambe de bois. Par la Torche
qu’elle porte, il eſt demonſtré que tout l’eſclat qu’elle teſmoigne
en apparence pour tromper autruy, ſe paſſe auſſi viſte
qu’vn feu de paille ; Par ſes Maſques & ſes Langues, qu’elle
prend toute ſorte de viſages, & accomode en cent façons ſa
cajollerie au deſſein qu’elle a d’attirer ceux qu’elle veut perdre ;
& par la jambe de bois, que toutes ſes allées & ſes venuës ſont
contrefaites ; qu’en ſes actions elle ne marche iamais droit, &
qu’il y a touſiours plus d’artifice que de naturel.
Férocité.
A voicy repreſentée par vne ieune Dame, pleine de
fougue, & armée de toutes pieces, tenant vn Baſton
de Cheſne auec la main droite, & portant la gauche
ſur la teſte d’vn Tigre furieux. Elle eſt peinte ieune, pource
que le ſang qui prédomine à cét âge-là, rend les hommes ardans
à tout entreprendre, ſans rien craindre. On la peint armée, dautant que les Armes rendent ordinairement ceux qui les portent
hardis & violens. Quant au Baſton de Cheſne, on le luy
donne pour ſymbole d’vn naturel indomptable ; car c’eſt en ce
ſens que les plus celebres Poëtes le prennent ; & pour cette
meſme raiſon encore elle porte la main ſur vn Tygre, Animal
farouche, & qui eſt celuy de tous les autres qu’on peut le moins
appriuoiſer.
Fravde.
Ovs la voyez icy auecque deux Teſtes entées ſur vn
meſme Col, l’vne deſquelles eſt d’vne perſonne ieune,
& l’autre d’vne vieille. Elle tient deux Cœurs de la
main droite, & de la gauche vn Maſque, ayant vne queuë de
Scorpion, & au lieu de pieds, les Serres d’vn Aigle. Le double
Cœur ſignifie la Trahiſon, & le Maſque la Diſſimulation dont elle vſe. I’obmets que par la queuë de Scorpion eſt denoté le
pernicieux venin qu’elle darde ; & par les Serres d’Aigle, qu’elle
eſt comparable à vn oyſeau de proye, pour ne ſe propoſer
d’autre but que de rauir l’honneur & le bien d’autruy.
