Detraction.
Lle eſt peinte aſſiſe, & couuerte d’vne robe toute
ſemée de Langues, tenant vn Poignard de la main
droite, & vn Rat de la gauche. On la repreſente aſſiſe,
pource que l’Oiſiueté eſt la principale cauſe de
la Detraction. Les Langues qu’on luy donne ſignifient, qu’elle
ne ſe laſſe iamais de parler mal d’autruy ; le Poignard, que par
vne rage du tout extraordinaire, déchirant la reputation du
Prochain, elle le traitte plus mal que ſi elle luy donnoit la
mort ; & le Rat, qu’à l’imitation de cét Animal nuiſible, elle
ronge la plus pure ſubſtance de l’homme de bien, qui eſt l’Honneur
& l’Integrité.
Espion.
L eſt repreſenté par vn Homme qui ſe couure le viſage
de ſon Manteau, tout ſemé d’Yeux & d’Oreilles. Auec cela on luy fait tenir en main vne Lanterne
ſourde ; outre qu’il a des Aiſles aux pieds, & vn Chien
qui marche deuant luy. Il a le Viſage couuert, pour monſtrer
que ceux qui font les Eſpions, ſont ſoigneux ſur toutes
choſes de ne ſe point faire conneſtre, pour deſcouurir auec
moins de ſouçon ce qui ſe paſſe, & particulierement à la Cour
des Princes. Les Yeux & les Oreilles ſignifient, que le meſtier
de telles perſonnes eſt de tout voir, & de tout oüir, non pas
ſeulement de iour, mais de nuit encore ; ce qui eſt denoté par
la Lanterne que cét Homme tient en main. Quant aux Aiſles
qu’on luy met aux pieds, & au Chien qui le ſuit, c’eſt pour faire
voir combien eſt grande la diligence des Eſpions, & quelle
leur adreſſe à flairer de loin les plus ſecrettes practiques.
Envie.
’Envie, qui s’attriſte ordinairement du bien du
Prochain, autant qu’elle ſe reſioüit du mal qui luy
arriue, fait voir l’vn & l’autre de ces effets par le Serpent
qui luy ronge la mammelle gauche, & par l’Hydre
qu’elle careſſe : Car comme ce monſtrueux Animal ayme
naturellement à infecter de ſon venin tous ceux qui l’approchent ;
l’Enuieux de meſme par vne ſecrette Contagion ſe plaiſt
à perdre les plus gens de bien, ſans eſpargner ſes plus proches,
ny ceux dont il fait ſemblant d’eſtre Amy.