Calomnie.
Ette Femme en cholere empoignant par les cheueux
vn petit Enfant, qui luy demande pardon, &
tenant de l’autre main vne Torche allumée, eſt le Tableau
de la Calomnie. Par où il nous eſt enſeigné,
Que les plus dangereux effets de cette Furie ſont engendrez
d’vne hayne ſecrette, & d’vn deſir de vengeance ; qu’elle eſt
capable au reſte d’allumer la Diſcorde dans tous les Eſtats du
mõde ; & que ce luy eſt vne choſe naturelle de déchirer autant
qu’elle peut la reputation des Innocens. Auſſi luy donne-t-on
pour Figure Hyeroglifique vn Baſilic, pour monſtrer que comme
ce dangereux Animal tuë de loin par ſa veuë, le Calmoniateur
de meſme ruine entierement par ſa meſchante langue
ceux qu’à quelque prix que ce ſoit il ſe propoſe de perdre.
Contrarieté.
E n’eſt pas mal à propos qu’on la peint auec vne Robe
moitié noire, & moitié blanche, & qu’auec cela on
luy fait tenir d’vne main vn Vaſe, dont leau ſe reſpand ;
& de l’autre vn Réchaud plein de feu ; ce qui n’a pas beſoin
d’autre explication, puis qu’on ſçait aſſez que ces deux
Elemens ſont directement contraires. Quant aux deux Rouës
qui ſe voyent en bas, elles marquent l’Inconſtance de ces hommes
perſomptueux, qui ſe plaiſent à chocquer & à contredire
les ſentimens de tout le monde ; vice dangereux, & entierement
inſupportable.
Comedie.
Lle eſt miſe icy non pas pour vn vice, mais pource
qu’elle expoſe ſur le Theatre, les vices des hommes
afin de les faire auoir en horreur, & de les induire par
l’exemple d’autruy à corriger leurs mœurs, comme le declarent
ces mots, Describo mores hominvm. Et dautant que
les Anciens en leurs Comedies ſe ſeruoient ordinairement &
du Clairon, & du Maſque, ce n’eſt pas ſans ſujet qu’on les luy
met icy en main, à cauſe que l’vn ſignifie l’Harmonie, & l’autre
l’Imitation.
