Ambition.
’Ambition, qui ſelon S. Thomas, eſt vn appetit
deſreglé de ſe faire grand par toutes ſortes de voyes,
ou bonnes, au mauuaiſes, eſt icy peinte ieune, auec
les Pieds nuds, & vne Robe courte, dont la couleur
doit eſtre verte. Elle a des Aiſles au dos, & la teſte chargée de
Couronnes, de Mitres, & de toutes les autres marques d’honneur
qui accompagnent les Dignitez les plus hautes. A quoy
i’adjouſte qu’elle a derriere elle vne Mer orageuſe, auec vn Lion
qui ſuit ; & que toutes ces choſes enſemble ſignifient, qu’ordinairement les ieunes hommes, pour la bonne opinion qu’ils ont
d’eux-meſmes, & pour les grandes eſperances qu’ils conçoiuent
de leur vertu pretenduë, ſont particulierement ſujets à ce
Vice. Les Aiſles ſignifient, que les Ambitieux veulent toûjours
voler par deſſus les autres ; la Robe courte, les Pieds nuds, & la
Mer irritée, qu’ils ont beaucoup à ſouffrir, pour venir à bout
de leurs pretentions, qui les font aſpirer vainement à la poſſeſſion
des Sceptres & des Couronnes.
Avevglement d’esprit.
N le repreſente par vne ieune Femme qui eſt dans
vn jardin, où elle monſtre vne Taupe d’vne main,
& de l’autre elle tient vne Tulipe. D’où il paroiſt
manifeſtement que la Taupe pour n’auoir point
d’yeux, eſt vn ſymbole de l’Aueuglement d’eſprit ; & que la
Tulipe en eſt vne autre, puis qu’il ſe voit auiourd’huy que ceux qu’on appelle Curieux, n’ont pas moins de paſſion pour cette
Fleur, que pour vne belle Maiſtreſſe.
Avarice.
Ette Femme qui a le ventre ſi gros, qui tient vne
Bourſe, & qu’vn Loup maigre accompagne, ne repreſente
pas mal le naturel des Auares, leſquels
ſemblables aux Hydropiques, ne peuuent eſteindre
la ſoif qu’ils ont des richeſſes, mais tels que des loups rauiſſans,
ont pour les choſes du monde vne faim inſatiable, ou meſme
enragée.
