Rome la sainte.
Ovs la voyez icy debout, ayant au deſſous de ſes Armes
vne Robe de pourpre brochée d’or. Elle porte
pour Cimier ſur ſon heaume le Caractere, tenant en la
main droite vne Lance, en forme de Croix par le haut, où ſe
voit au milieu d’vne Ouale garnie des perles le Caractere ſuſdit ;
& de la gauche elle porte vn Bouclier & deux Clefs croizées,
l’vne d’or & l’autre d’argent, auec la triple Couronne ;
appuyant la pointe de ſa Lance ſur vn Dragon. Le Cimier denote
le nom de Christ, que portoit ordinairement ſur ſon
habillement de teſte le grand & victorieux Conſtantin, premier
Empereur, qui par ce ſacré Nom, & par l’Eſtendard de la
Croix ſanctifia la Ville de Rome : Auſſi fut-ce par là ſeulement
qu’il vint à bout d’vn cruel Ennemy, & qu’il ſubiugua l’Idolatrie,
Monſtre difforme, & Dragon eſpouuentable. Quant aux
Armes qui ſe voyent ſur ſon Bouclier, il ſuffit de ſçauoir qu’elles
ſont les glorieuſes marques de la dignité Pontificale, qui eſt
reuerée de toute la terre.
Simplicité.
Lle eſt repreſentée en ieune Fille veſtuë de blanc, tenant
de la main droite vne Colombe, & de la gauche
vn Faiſan, auec ces mots alentour, Doce me facere volvntatem tvam, qvia Devs mevs es tv. On l’habille
de blanc, pource que cette couleur eſt ſans melange, & la
plus ſimple de toutes. A quoy i’adjouſte que dans les ſainctes
Lettres la Colombe eſt le ſymbole de la vraye & loüable Simplicité ;
ce que l’on peut dire encore du Faiſan, qui ſelon quelques
Autheurs, s’imagine qu’on ne le voit point quand il ſe
cache la teſte.
Sincerité d’ame.
Lle a pour Embleme vne jeune Fille, ſur le ſein de
laquelle eſclatte vn Soleil, marque de l’integrité de
ſon Ame. Auſſi pour teſmoigner qu’elle n’a point de plaiſirs
qui ne ſoient innocens & tous purs, elle eſt repreſentée
donnant à manger à vn Poulet blanc, & tenant vn Lis de la
main gauche, auec ces mots, Et spiritvm rectvm innova in visceribvs meis.