Regret.
E Regret des fautes paſſées ſe demonſtre icy par
vne Dame affligée, qui a le cœur rongé de vers, veritables
ſymboles des ſecrets remords de ſa conſcience.
Elle a les yeux fixes vers le Ciel, & baignez
de larmes, qui ſont les marques de ſa douleur. Et dautant que
parmy les geſnes & les tortures que luy donnent ſes offenſes,
elle attend toute ſon aſſiſtance de Dieu ; auſſi ne s’adreſſe-t’elle
qu’à luy, & dit auec le Prophete, Cor contritvm et hvmiliatvm Devs non despicies.
Restitvtion.
Ette Femme, qui ſe tenant debout entre vne Caſſette
& vn Sac d’argent, compte d’vne main à l’autre
celuy qu’elle vient de prendre, ſignifie que la Reſtitution
du bien mal acquis ſe doit faire volontairement,
& ſans y auoir du regret, puiſque ſans elle le peché n’eſt
point remis, & que c’eſt par elle meſme qu’il le faut reparer
neceſſairement.
Reformation.
’Eſt la Figure d’vne vieille Dame, qui de la main droite
tient vne Sphere, & de la gauche vne Liure ouuert,
où ſe liſent ces paroles, Obsecra, argve. Par la Reformation
ſe doit entendre le reglement des abus, qui ſe ſont
gliſſez inſenſiblement par la licence des hommes. A quoy l’on
peut paruenir par deux principaux moyens, qui ſont l’exhortation,
& la reprimande : ce que donnent à conneſtre les deux mots
qui ſe voyent dans le Liure que tient cette Femme. Quant
à la Sphere qu’on luy donne, ie n’en ſçay point d’autre cauſe, ſi
ce n’eſt poſſible pour monſtrer qu’à l’exemple du Ciel, qui eſt
reglé en ſes mouuements, il faut que les actions des hommes
le ſoient de meſme, par la correction & la vigilance de leurs
Superieurs.
