Occasion.
Ette Femme nuë, qui tient vn Voile à la main,
eſt le ſymbole de l’Occaſion. Elle eſt chauue par
derriere, & cheueluë par deuant, pour nous apprendre
qu’il la faut empoigner quand elle ſe preſente,
de crainte qu’elle ne nous eſchappe ; car elle eſt volage,
& touſiours preſte à s’enfuir. Voila pourquoy elle eſt icy peinte ayant vn pied en l’air, & l’autre ſur vne Rouë. Quant au Raſoir
qu’elle porte, il ſignifie que dés auſſi-toſt qu’elle s’offre à nous,
il eſt neceſſaire de retrancher toutes ſortes d’empeſchemens &
d’obſtacles, pour la ſuiure où elle nous appelle.
Oraison.
N la peint icy ſous la perſonne d’vne vieille Femme,
pour monſtrer qu’en la vieilleſſe plus qu’en vn
autre âge, nous nous adonnons à l’Oraiſon, à cauſe
qu’alors nous ſommes plus proches de noſtre derniere
fin. Elle a la teſte couuerte, & ſe tient à genoux, pource
qu’vne vraye priere doit eſtre faite en particulier, & ſans oſtentation.
Le Cœur qu’elle tient d’vne main demonſtre ſon zele,
& la ſincerité de ſon ame. Dequoy l’on peut dire encore que
l’Encenſoir eſt le vray ſymbole ; a qu’vn Chappelet y tient
lieu de chaiſnettes pour l’attacher, a cauſe que le Chreſtien s’en
ſert ordinairement à faire ſes principales prieres, qui ſont le
Pater noſter, & l’Ave Maria.
Pvdicité.
Ovr Embleme de la Pudicité ſe voit icy peinte cette
ancienne Veſtale Romaine, qui pour vn teſmoignage
d’auoir conſerué la ſienne inuiolable, ayant
inuoqué les Dieux contre ſes Accuſateurs, teſmoigna
ſon innocence, en tirant à terre à contremont vn gros Nauire
auec vn ſimple filet.