Loy natvrelle.
Ar cette Femme agreable, aſſiſe au milieu d’vn jardin,
& qui n’eſt couuerte que de la ceinture en bas, eſt figurée
la Loy Naturelle. Sa beauté nous apprend, qu’en la
naiſſance du monde, Dieu fit belles & parfaites toutes les choſes
qui s’y voyent. Sa nudité, & ſa cheuelure ſans art, qu’il n’y a
ny fard ny déguiſement en cette Loy, non plus qu’en ſon Autheur ;
le Compas qu’elle tient auecque ces mots, Æqua lance,
qu’il ne faut point faire aux autres ce que nous ne voudrions
pas qu’ils nous fiſſent ; & ſon ombre propre, qu’elle monſtre de
la main gauche, que de la façon qu’elle ſe gouuerne enuers le
Prochain, elle ſe le rend entierement ſemblable. A quoy i’adjouſte
qu’elle eſt aſſiſe en vn beau jardin, pour mõſtrer qu’ayant
eſté miſe du commencement dans le Paradis terreſtre, elle en
fut chaſſée depuis, & reduite à cultiuer la terre, pour luy faire
produire tout ce qui s’y voit aujourd’huy, non ſeulement de
beau, mais de profitable encore.
Magnanimité.
Oicy la vraye grandeur de Courage, que cette Dame
majeſtueuſe nous repreſente. Elle eſt richemẽt veſtuë,
pour monſtrer que les richeſſes ſont iuſtement deuës à
ceux qui en vſent noblement, & voila pourquoy on luy donne
auſſi la Corne d’Abondance. Quant à la Couronne Imperiale,
& au Sceptre qu’elle tient en main, l’vn ſignifie le genereux
deſſein que l’on a de faire du bien, & l’autre la puiſſance de
l’executer, qui ſont deux choſes ſans leſquelles il eſt impoſſible
d’exercer la Magnanimité. Que ſi elle eſt aſſiſe ſur vn Lion,
c’eſt pource que le Lion, Roy des Animaux, eſt vn ſymbole de
cette Vertu, qui eſt Reine auſſi de toutes les autres.
Magnificence.
Ette Dame couronnée ne tient pas ſans raiſon vne
Palme dans l’vne de ſes mains, & l’autre appuyée ſur vn
Plan d’Architecture, pour monſtrer que cette Vertu
victorieuſe des années, ne ſe propoſe que des ſujets illuſtres, &
qu’vn de ſes effets principaux c’eſt de baſtir des Temples &
des Palais, qui ſont des Ouurages par le moyen deſquels les
plus grands Princes rendent à la Poſterité leur nom ou leur memoire
celebre.