ſe deſnuer de toutes les choſes qui peuuent bleſſer noſtre ame ; et le Tourne-ſol, qu’à l’imitation de cette Fleur, qui ſuit toûjours le Soleil, le Pecher conuerty, & embraſé de l’amour diuine, ouure ſon cœur à Dieu, & ſe tourne ſans ceſſe vers luy.
Ievsne.
Oicy l’Embléme du Ieuſne, que cét Homme en vn
âge floriſſant eſtale à vos yeux. Il eſt debout ſur vn
Crocodile, a la bouche bandée, tient d’vne main vn
Lievre, & de l’autre vn Poiſſon, auec vn Eſcriteau, qui dit,
Pavca vescor. On le peint d’âge robuſte, afin de monſtrer
que la force & la ſanté ſont neceſſaires pour ieuſner. Il eſt debout
ſur vn Crocodile, pour faire voir qu’il foule aux pieds la
Gourmandiſe, dont cét Animal chez les Egyptiens eſtoit vne
Figure hieroglyphique. Quant au Lievre qu’il tient ſous le bras
gauche (animal qui dort les yeux ouuerts) il ſignifie la vigilance
de ceux qui ieuſnent, par le moyen de laquelle ayant l’eſprit
eſpuré, ils s’eſleuent plus haut à la contemplation des choſes
celeſtes. A quoy i’adjouſte que le Poiſſon Cephale, qu’il tient
de la main gauche, eſt le ſymbole de l’Abſtinence, repreſentée
par ces mots, Pavca vescor, c’est à dire, Ie mange peu.
Liberalité.
Ette Figure s’explique aſſez d’elle-meſme, par l’action
d’vne belle ieune Dame, qui de la main droite diſtribuë
liberalemẽt à de petits enfans des pieces d’or & d’argẽt,
& les prend dans vne Couppe qu’elle tient de la main gauche.
Loyavté.
Lle ſe couure d’vne Robe deliée, tenant d’vne main
vne maniere de Falot, ou de Lanterne allumée, & de
l’autre vn Maſque rompu en diuers endroits. La Robe
deliée ſignifie, que l’homme fidelle doit faire pareſtre dans ſes
paroles la ſincerité de ſes actions, comme la lumiere paroiſt à
trauers le verre qu’elle perce. & par le Maſque rompu, il nous
eſt declaré qu’il eſt difficile de n’eſtre pas ennemy de ceux qui
ont l’ame double, & dont l’amitié n’eſt que feintiſe & deſguiſement.
