Hvmanité.
E qu’on appelle icy Humanité, ſe peut plus proprement
nommer Accortiſe, ou Courtoiſie, qui
eſt vne certaine inclination à ſe rendre complaiſant
à l’humeur dautruy. On la repreſente
par vne belle Dame, tenant deuant elle quantité
de fleurs, qui ne ſont pas moins agreables à la veuë qu’à l’odorat ;
& vne Chaiſne d’or de la main gauche, pour monſtrer
que les ames genereuſes ſemblent s’attacher entr’elles par les
mutuels offices qu’elles ſe rendent.
Hvmilité.
Elle à qui vous voyez icy tenir vne Palme à la
main, & vne Couronne ſous ſes pieds, eſt l’Humilité,
vertu qui rend la perſonne qui la poſſede d’autant
plus loüable, qu’elle fait gloire d’eſtimer comme
vn neant ſon propre merite : Auſſi luy donne-t’on vne
Palme, à cauſe que tant plus on taſche de l’abbaiſſer, tant
plus elle ſe releue ; outre que par la Couronne ſouſmiſe à ſes
pieds, eſt demonſtré le meſpris qu’elle fait des grandeurs &
des vanitez de la terre.
Honnevr.
E Guerrier qui porte vne Couronne de Palme, vne
Chaiſne d’or, des Bracelets, vne Lance, & vn Eſcu,
où ſont peints deux Temples auecque ces mots,
Hic terminvs hæret ; n’eſt pas mis icy hors
de propos pour le Tableau de l’Honneur. Eſtant fils de la Victoire,
c’eſt à bon droit qu’il a le front ceint de Palmes, & que
la Lance, l’Eſcu & les Bracelets luy ſont donnez pour enſeignes
& pour recompenſes de ſa Valeur. Quant à la Deuiſe des
deux Temples, elle nous apprend que l’Honneur & la Vertu
ſont tellement inſeparables, qu’on ne peut entrer dans l’vn que
par l’autre.
