Foy d’amitié.
Ette Femme vieille & chenuë, couuerte d’vn Voile,
& qui en tient vn autre à la main, repreſente la
Foy mutuelle que ſe doiuent ceux qui s’ayment veritablement.
Ce qu’elle tient la main droite voilée fut
autresfois de l’inſtitution de Numa Pompilius Roy des Romains,
dans le Sacrifice qui ſe faiſoit ſur l’Autel de la Fidelité.
Par où il vouloit donner à entendre, qu’il faut qu’elle ſoit inviolable entre Amis. Quant à la Vieilleſſe, elle nous apprend
que les perſonnes aagées ſont incomparablement plus ſoigneuses
de garder leur foy que les jeunes.
Grace divine.
’Est icy le ſacré Tableau de la Grace diuine,
ſous la
forme d’vne belle Dame, ayant ſur ſa teſte vne Colombe,
& vn Eſcriteau, où ſe liſent ces paroles, Bibite, et inebriamini.
La Colombe ſignifie le S. Eſprit, par qui la Grace
diuine eſt infuſe en nos Ames ; Et dautant que cette Grace ne
vient que de Dieu, c’eſt à raiſon de cela que cette Dame regarde
le Ciel. Au reſte par le Liure ouuert, & par le Rameau d’oliuier
qu’elle tient en main, il nous eſt enſeigné que par la meſme
Grace le Pecheur fait ſa paix auec Dieu ; & que cette reconciliation eſt ſi douce, que l’enyurant, par maniere de dire, d’vne
ſainte amour, elle luy fait perdre la ſoif des choſes du monde.
Govvernement de la repvblicque.
E Gouuernement vous eſt icy figuré par l’image d’vne
ſeconde Pallas, ayant vn Morion ſur le chef, vn Rameau
d’oliuier en la main droite ; & en la gauche vn
Dard, outre qu’auecque ce meſme bras elle ſouſtient vn
Bouclier. Elle reſſemble à Pallas, pource que le bon Gouuernement d’vn Eſtat doit eſtre fondé ſur la Sageſſe, ſur les forces
de la Guerre, & ſur les biens de la Paix, qui ont pour
ſymboles le Morion, le Dard, le Bouclier, & l’Oliuier.
