Estovffement des mavvaises pensees.
’Enfant que cét Homme tient en ſes mains, pour
l’eſcraſer comme les autres qui ſe voyent abattus à ſes
pieds, eſt vn Embléme des mauuaiſes pensées, qu’il faut
eſtouffer en leur naiſſance, de peur qu’elles ne s’enracinent, &
ne prennent pied touſiours plus auant. Quant à la Pierre triangulaire,
elle eſt vne figure de Ieſus-Chriſt ; Pour monſtrer, conformément
à ces paroles du Pſeaume 36. Heureux qui tiendra, & qui eſcraſera les enfans contre la pierre ; Qu’il faut eſtimer veritablement heureuſe la condition de ceux qui s’abſtiẽnent des
vices, & qui briſent leurs premiers mouuemens contre cette
Pierre myſterieuſe, qui eſt la baſe inébranlable de noſtre ame.
Fermeté.
Lle eſt repreſentée par vne Femme veſtuë d’vne
Robe d’azur, toute ſemée d’Eſtoiles, & qui arreſte ſi
fortement vn Taureau, qu’elle l’empeſche de paſſer
outre : D’où il paroiſt aſſez clairement que le Taureau eſt le
ſymbole de la Force ; & que par la Robe de couleur celeſte,
toute brillante d’Eſtoiles, eſt denotée la Fermeté du Ciel, qui
n’eſt nullement ſujet à ce changement que les Philoſophes appellent
Local, & ne peut chanceler ny eſtre eſbranlé en aucune
de ſes parties.
Fragilité.
Ette Femme couuerte par tout le corps d’vn voile
fort delié, tenant de la main droite vn Bouquet de
fleurs & de deſueilles, & de la gauche vne Fiole de verre,
qui pend à vn filet, repreſente aſſez bien, ce me ſemble,
l’humaine Fragilité. Car on ſçait aſſez qu’il n’est rien qui ſe deſchire
plus facilement qu’vn Voile, ou telle autre etoffe deliée ;
rien qui ſoit plus ſujet à ſe fletrir que les fleurs, ny rien qui ſe
caſſe & ſe deſtruiſe pluſtoſt que le verre ; qui pour eſtre extremement
agreable aux yeux, nous fait ſouuenir encore que tout
ce que la Beauté peut avoir d’eſclat eſt fragile & periſſable.