Diligence.
A Diligence, qui eſt vn deſir ardent de voir la fin
d’vne choſe qu’on a entrepriſe, ſe voit icy figurée
par vne Femme, qui de la main droite tient vn Eſperon,
& de la gauche vn Horloge ; ſymboles qui
ne ſont pas mis icy mal à propos, puiſque c’eſt le Temps qui
meſure la Diligence, & l’Eſperon ce qui la fait naiſtre.
L’vn effeuille nos ſoins par ſa grande viteſſe,
Et l’autre eſt l’aiguillon qui nous picque, & nous preſſe.
Doctrine.
Ette Femme aſſiſe tenant de ſa main droite vn
grand Liure, poſé ſur deux Palmes & de ſa gauche
vne Flame, eſt la vraye image de la Doctrine.
Car elle eſt vne lumiere, qui ſe communique inſenſiblement à
l’eſprit dés noſtre bas âge ; & qui nous apprend la verité des
ſciences, qui ne doiuent pas eſtre couuertes d’aucun fard, mais
telles que les repreſente icy la nudité d’vn Enfant.
Devotion.
Lle eſt peinte à genoux, ſous la forme d’vne belle
Dame, ayant les yeux eſleuez au Ciel, d’où s’eſlancent
des rayons, & qui tient de la main droite vn
Cierge allumé : Ce qu’on peut prendre pour vne
marque myſterieuſe de l’ardent zele que produit la deuotion,
que les Theologiens appellent vn Acte particulier de la volonté,
qui rend l’homme prompt à donner à Dieu toutes ſes affections & ſes œuuvres.
