Quant à la Fleur de Narciſſe qu’on luy met en la main droite, c’eſt à raiſon de la metamorphoſe de ce ieune preſomptueux, de qui les Poëtes ont feint qu’il changea de forme pour ſe rendre adorateur de ſon ombre.
La figure du Paon denote le meſme, à cauſe que cét oyſeau conſacré à Iunon, ſe plaiſt ſi fort en la beauté de ſon plumage, que pour l’extreme plaiſir qu’il prend à s’y mirer, il a donné lieu à ce commun dire, que l’homme orgueilleux poſe ſa peau pour ſe couurir des plumes du Paon.
Contentement.
E ieune homme qui ſe void icy peint richement veſtu,
ayant l’eſpée au coſté, vn miroir en la main droite,
& en la gauche vn baſſin d’argent, plein de pieces
d’or & de pierreries, fait voir à ſa mine qu’il eſt content,
ou du moins qu’il a chaſſé pour l’heure preſente tout ce
qui cauſe ordinairement du chagrin à ceux qui n’ont point ce
qu’il leur faut.
Le Contentement d’où deſpend ce peu de bon-heur dont l’homme joüit en cette vie, naiſt principalement de la connoiſſance qu’il a du bien qu’il poſſede ; car autrement il eſt impoſſible qu’il le puiſſe iamais gouſter. A raiſon dequoy ce ieune Homme qui repreſente ce meſme Contentement, eſt peint icy auec vn miroir où il ſe contemple, couuert de riches habits, & tout eſclattant de pierreries.
Cvpidité ov convoitise.
Lle nous eſt figurée par vne Femme nuë, qui a les
yeux bandez, des grandes aiſles ſur les eſpaules, &
des aiſlerons aux pieds.
La Conuoitiſe eſt vn appetit aueugle, & qui ſe iette hors des bornes que la Nature nous a preſcrites, à cauſe dequoy elle a les yeux bandez, pource qu’elle ne ſe ſert en aucune ſorte de la lumiere de l’Entendement. Ses aiſles ſont les marques de ſa legereté, & de l’extreme viſteſſe dont elle ſe porte à ſuiure les choſes qui ſe preſentent deuant ſes yeux, ſous vn ſpecieux pretexte d’eſtre agreables & bonnes.
On ne luy donne aucuns habits, pour faire voir par ſa nudité qu’elle deſcouure facilement ſon eſtre.
