Le Myrte dont elle eſt couronnée, eſt le ſymbole de la Luxure, à laquelle cette Plante contribuë grandement, comme le remarquent les Naturaliſtes.
Son Chariot eſt tiré par des Pigeons, à cauſe de l’extreme laſciueté de ſes Oyseaux, qui ſont en amour toute l’année.
Elle tient vn Globe de la main droite, à raiſon du ſouuerain empire qu’elle s’attribuë ſur tout le Monde ; Et trois Pommes de la gauche, pour memoire du Iugement de Paris, où le prix de la Beauté luy fut donné.
Quant aux trois Graces, on les met icy derriere ſon Chariot, dautant qu’elles ſont comme ſes Filles ſuiuantes, qui par la force de leurs attraits eſbranlent facilement ceux qui ne ſont pas encore bien affermis ſur vne vertu ſolide.
Eloqvence d’Amovr.
Voy que les Amans ſoient d’ordinaire ſi tranſportez
de paſſion, qu’ils ne peuuent quelquefois dire vn
ſeul mot, & demeurent comme interdits deuant
leurs Maiſtreſſes ; Il ſe voit neantmoins par eſpreuue,
qu’apres ce premier accez, qui eſt comme le friſſon de leur fievre, Amour leur denoüe la langue, & les rend ſi eloquens, qu’ils
n’ont pas beſoin d’autres preceptes, que de ceux qu’il leur inſpire
naturellement, pour perſuader ce qu’ils veulent à la choſe
aimée : Ce qui ne peut mieux eſtre repreſenté ce me ſemble que
par le reuers de cette Medaille, où Mercure, Dieu de la Perſuaſion,
guide les trois Graces, pour nous faire entendre que
comme elles ſont eſtroitement iointes enſemble, & ne s’abandonnent
iamais ; l’Eloquence de meſme eſt inſeparable d’auec
elles.
