Elle eſt aſſiſe Royallement & pleine de majeſté, pource que les plus grands emploits ne doiuent eſtre fiez qu’à des perſonnes de condition éminente.
On luy donne vn faiſſeau de verges liées enſemble, pour nous apprendre la grande vnion qu’il y doit auoir dans vn Eſtat pour le bien & la conſeruation du public.
Quant au Heaume qu’elle porte, & aux threſors qui ſont à ſes pieds, cela veut dire que l’argent eſt le nerf de la guerre, & que ſi les peuples ſe veulent conſeruer, il ne faut pas qu’ils en ſoient auares.
Democratie.
Ette Femme couronnée de Pampres & modeſtement
veſtuë, tenant de la main droite vne Pomme
de Grenade, de la gauche des Serpens, auec des
grains dont elle a deux ſacs remplis, repreſente
la Democratie.
Par elle s’entend vn Eſtat populaire, c’eſt à dire qui eſt gouuerné par le Peuple, en forme de Conſeil & d’Aſſemblée, où chacun peut donner ſa voix, pour deliberer des affaires publiques.
On la couronne de Pampre & de fueilles d’Ormeau, pour monſtrer que comme ces deux plantes s’vniſſent enſemble, le Peuple en fait de meſme.
Son habit modeſte s’accomode à la condition du Peuple, qui pour n’auoir aſſez de moyens, ne peut mettre en euidence le deſir ambitieux qu’il a d’aller du pair auecque les autres, qui ſont de plus grande condition que luy.
Elle tient en la main droite vne Pomme de Grenade, à cauſe Hierogliph. l. 54 que ce fruit-là, comme le remarque Pierius Valerian, eſt le Symbole d’vn Peuple aſſemblé dans vn lieu, & qui ſe gouuerne ſelon ſa condition & les moyens qu’il en peut auoir.
Les Serpens qu’elle tient en main, ſignifient que comme le Peuple n’eſt ordinairement touché d’aucune conſideration de vraye gloire, ſon gouuernement de meſme ne fait que ramper.
Pour ce qui eſt des grains qui ſont dans les ſacs, ils figurent les prouiſions qu’on accouſtumé de faire les Communautez, qui ont plus d’ambition pour les viures que pour les honneurs.
