Diverses vies.
L y a deux chemins qui conduiſent à la felicité, &
peut-on bien dire qu’ils ſont diuers, ſelon que les
inclinations, & les raiſons perſuaſiues ſe treuuent
differentes en l’homme. Ils ſont compris l’vn &
l’autre ſous les noms de vie Actiue et Contemplatiue, que Noſtre
Sauueur approuua en la perſonne de Marthe & de Marie
Magdelene. Or bien que celle qui eſtoit attentiue à l’action
fuſt preferée, l’autre neantmoins ne laiſſa pas d’eſtre digne &
de loüange & de recompenſe.
Vie active.
N la peint en homme d’aage & robuſte, qui porte
vn grand chapeau ſur ſa teſte, vne beſche en la main
droite, & en la gauche vn ſoc de charruë ; par où
il eſt monstré, que de tous les exercices, l’agriculture
eſt le plus agiſſant & le plus neceſſaire auſſi à la conſeruation
de l’homme. Ie diray à ce propos que Michel l’Ange, le
plus excellent de tous les Peintres de ſon temps, repreſenta la
Vie Actiue ſur le tombeau de Iules ſecond, par Lia fille de Laban,
à laquelle il fit tenir vn miroir d’vne main, pour donner
à connoiſtre par là que nous deuons faire vne ſoigneuſe reflexion
ſur nos actions ; & en l’autre vne guirlande de fleurs,
pour ſymbole des vertus qui embelliſſent noſtre vie, & la
rendent glorieuſe, apres que nous ne ſommes plus au monde.
Vie hvmaine.
N la repreſente par vne Femme veſtuë de verd,
ayant ſur la teſte vne guirlande faite de l’herbe que
l’on appelle Semperuiua, ou Touſiourſuiue, & au
deſſus de cette guirlande vn Phenix ; outre qu’elle
tient en ſa main droite vne Lyre auec vn archet, & en la gauche
vne Couppe, dont elle ſe ſert à donner à boire à vn enfant.