Vertv de corps et de covrage.
Lle eſt repreſentée par vn Hercule tout nud, tenant
ſa maſſuë d’vne main, & menant de l’autre vn Lyon
& vn Sanglier qui marchent enſemble.
Par Hercule auec ſa maſſuë & ſa peau de Lyon, ſe doit entendre l’idée de toutes les Vertus ; par le Lyon la force du Courage, comme le teſmoigne Orus Apollo dans les Figures Hyeroglifiques ; & par le Sanglier, celle du Corps ; Où il eſt à remarquer que pour denoter l’vn & l’autre, Admet s’aduiſa de ioindre enſemble le Lyon & le Sanglier, ainſi que le rapporte Pierius dans vn endroit où il parle du Signe du Lyon.
Vertv heroiqve.
Lle eſt repreſentée en trois façons par trois autres
figures d’Hercule, tirées des Medailles des Empereurs,
dont la premiere eſt de Gordien, la ſeconde de
Maximin, & la troiſieſme de Gera. La principale eſt celle d’vn
Hercule veſtu de la peau d’vn Lyon, & qui d’vne main s’appuye ſur ſa maſſuë, tenant de l’autre trois Pommes d’or. Ces
Pommes cueillies au Iardin des Heſperides, comprennent enſemble
les trois Vertus heroïques attribuées à ce dompteur
des monſtres, à ſçauoir la moderation de la colere, la haine
conceuë contre l’auarice, & le meſpris des voluptez, par qui
les hommes ſe laiſſent charmer.
Dans l’autre Figure le meſme Hercule tout nud s’appuye ſur la teſte d’vn Cerf ; Symbole d’vn de ſes douze trauaux ; Et en la derniere il tient ſa maſſuë hauſſée, pour en aſſommer vn Dargon. Ce qui s’entend de celuy qui gardoit les Pommes des Heſperides dont ie viens de parler. Par où nous ſommes aduertis que la Vertu ne ſe propoſant point d’autre prix que ſoy-meſme, & les biens qui l’eſleuent au Ciel, dédaignent le faux eſclat des richeſſes de la terre.