Bonne renommee.
’On nous la figure icy par vne ieune Femme, qui
tient vne Trompette de la main droite, & de la
gauche vn Rameau d’Oliuier, ayant de plus des
aiſles blanches, & à ſon col vne chaiſne d’or, d’où
pend vn cœur pour joyau.
La Trompette ſignifie le bruit vniuerſel qui s’eſpand dans les oreilles des hommes.
Le Rameau d’Oliuier, l’integrité d’vn homme de bien, que ſes vertus rendent fameux & celebre. Car l’Oliuier & ſon fruit ſe prennent touſiours en bonne part, principalement dans les ſainctes Lettres, où il eſt dit que le nom de Noſtre Seigneur Iesvs-Christ eſt tel que l’huile eſpanduë.
I’obmets que les Anciens auoient accouſtumé de couronner Iupiter d’vne branche d’Oliuier, pour monſtrer qu’il eſtoit ſouuerainement bon ; et qu’icy le joyau en forme de cœur, eſt vn Symbole de cette meſme perfection, qui eſt encore denotée par la naïfue blancheur des aiſles, qu’on attribuë à cette Figure.
