Renommee, comme on la peint ordinairement.
Lle a deux grandes aiſles dont elle s’eſleue en l’air,
vne robbe deliée telle que ie viens de la deſcrire,
& deux Trompettes à la main, dont elle ſonne ordinairement,
paroiſſant aſſiſe ſur les nuës. Toutes
leſquelles choſes enſemble ſont aſſez claires pour faire voir
que c’eſt la couſtume de ne demeurer iamais en meſme lieu,
& de publier indifferemment le menſonge & la verité par
tout par où elle paſſe.
Glorievse renommee.
Ne ancienne Medaille de l’Empereur Trajan la
repreſente par vn Mercure, tenant de la main
droite vn Caducée, & en la gauche vn Cheuval
Pegaſe, qui ſemble prendre ſon vol en haut.
Cette Image de Mercure, auecque ſon Caducée, & ſes talonnieres denotent la glorieuſe Renommée, pource que ce Dieu, que les Anciens appelloient Courrier de Iupiter, excelloit en l’art de faire des meſſages, & de parler agreablement, auec vn ton de viox ſi retentiſſant qu’il ſe faiſoit oüir par tout.
Les aiſlerons de ſa teſte & ſes talonnieres, ſont les Symboles de la promptitude des paroles.
Par le Cheual Pegaſe, s’entend l’illuſtre Renommée d’Antinoüs, ſemée par tout le monde. Et par le frein de ce meſme Cheual que Mercure mene en main, il eſt demonſtré que par le moyen des paroles & de la voix, ſont eſpandus par toute la terre les faits memorables des plus grandes hommes.
