Clie.
Lle eſt peinte en ieune Fille, couronnée de Laurier, tenant de la main droite vne trompette, & de
la gauche vn Liure qui porte pour tiltre ce nom
propre Tevcydides.
Cette Muſe eſt appellée Clie, du mot Grec κλέα qui signifie loüer, ou poſſible de κλέος, qui eſt le meſme que gloire, pour monſtrer celle que s’acquierent les Poëtes dans l’eſtime des hommes ſçauans.
On luy fait tenir le Liure de Teucydide, à cauſe que c’eſt à cette Muſe qu’on attribuë l’inuention de l’Hiſtoire. Car, comme dit Virgile, In Epigram.
Cette Fille du Ciel dans vn comble de gloire
Chante des grands Guerriers les noms & la victoire.
C’eſt elle-meſme auſſi qui les empeſche de mourir ; Et voila pourquoy on la couronne de Laurier, pource que par le moyen de l’Hiſtoire elle rend immortelles les actions des grands hommes, de meſme que le Laurier ſe conſerue touſiours verd contre les injures du temps.
Evterpe.
N la repreſente couronnée d’vne guirlande de
fleurs, & tenant à deux mains vne longue fluſte
dont elle joüe, outre les clerons, les haut-bois, &
tels autres inſtrumens qui ſe voyent à ſes pieds.
Euterpe, à tirer ce mot du Grec, ſignifie agreable & plaiſante, à cauſe du plaiſir, & du merueilleux contentement qu’apportent les belles Lettres.
Quelques-vns veulent que cette Muſe ſoit au deſſus de la Dialectique, & la pluſpart diſent qu’elle ſe plaiſt particulierement au ſon des fluſtes & de ſemblables inſtrumens. Ce qui fait dire à Virgile,
Qu’elle fait retentir les rochers & les eaux,
Au doux air de ſa voix & de ces chalumeaux.
Au reſte on la couronne de fleurs à l’imitation des Anciens, qui en faiſoient touſiours des guirlandes aux Muſes.
