ſeichereſſe du corps procede de la chaleur, la repletion & la graiſſe ſont cauſes, ſelon Galien, d’vn excez de froideur & d’humidité ; On l’habille de la fourrure d’vn Blerreau, pour monſtrer que le Flegmatique n’eſt pas moins pareſſeux ny moins aſſoupy que cét animal. Ce qui procede de ce qu’il n’a que fort peu d’eſprits, encore ſont-ils eſtouffez par la froideur extraordinaire qui predomine en luy. D’où il arriue que les Flegmatiques ne ſont guere propres à l’eſtude, à cauſe qu’ayant l’eſprit émouſſé, ils ne peuuent comprendre rien de ſublime & de grand. Ce qui eſt encore donné à connoiſtre par la Tortuë, qui ne marche que peſamment & à pas tardifs.
Le melancoliqve.
L a le teint baſanné, tient de la main gauche vn Liure
ouuert comme s’il vouloit eſtudier, & de la
droite vne Bourſe liée, auec vn Paſſereau ſolitaire
ſur le haut de ſa teſte, vne bandelette qui luy ſerre
la bouche, & ſous ſes pieds vne figure quarrée.
La bandelette ſignifie que le Melancolique ne parle pas beaucoup, pour eſtre d’vn naturel froid & ſec ; comme au contraire la chaleur rend les hommes babillards.
Il tient vn Liure ouuert, pource que les gens de cette complexion s’addonnent volontiers aux bonnes Lettres, & que pour y vacquer plus commodément ils recherchent la ſolitude. Ce qui fait dire à Horace,
Que tous les Eſcriuains & de Proſe et de Vers
Preferent à la Cour les champs et les deſerts.
Auſſi eſt-ce pour cette meſme raiſon qu’on met ſur la teſte du Melancolique vn Paſſereau ſolitaire, qui s’eſcarte ordinairement des autres oyſeaux.
Quant à la Bourſe fermée, elle demonſtre que les Melancoliques ſont peu genereux & grandement auares.
