ſiecle d’argent les hommes commencerent à cultiuer la terre, pour tirer d’elle dequoy pouruoir à l’entretenement de leur vie.
L’aage d’airin.
N le repreſente par vne Femme armée, dont le viſage
eſt reſolu, & la robbe toute de broderie. Elle a
pour Cimier ſur ſon heaume la teſte d’vn Lyon, &
tient en main vne lance. Ce qui n’a pas beſoin d’autre
explication que de celle que luy donne Ouide, quand il dit,
Que cét aage cruel par vn art inhumain
Mit aux ieunes Guerriers les Armes à la main.
L’aage de fer.
Ne Femme eſpouuentable à voir eſt l’Embleſme
de ce dernier ſiecle, le plus rude de tous. Son habillement
eſt de couleur de Fer, ou de Fer meſme ;
car elle porte vn heaume qui a pour ſymbole vne
teſte de Loup, tenant de la main droite vne eſpée
nuë comme ſi elle vouloit combattre, & de la gauche vn Eſcu,
au milieu duquel eſt dépeint la fraude, ſous la figure d’vn
monſtre, ayant la teſte d’vn homme, & le corps d’vn ſerpent
couuert de diuerſes taches, ou ſi vous voulez, d’vne Sereine qui
attire les paſſans pour les deuorer. A toutes leſquelles choſes
ſont iointes diuerſes armes en forme de trophée, & pluſieurs
enſeignes de guerre.
La Sereine et le Monſtre ſont tous deux le vray ſymbole de la fraude, dont les effets cõmencerent à ſe produire en cét aage-cy particulierement, comme le remarque Ouide, quand il dit,
Alors la probité, la raiſon, la Iuſtice
Ayant abandonné le terreſtre ſejour ;
Dans les cœurs des Mortels regnerent à leur tour
Le menſonge, l’erreur, la fraude & la malice,
Ces Monſtres & ces maux enſemble deſchainez,
Du profond des Enfers ſortirent peſle-meſle
Et tout à meſme temps cette engeance cruelle
Tourmenta les meſchans en leur Vice obſtinez.