Octobre.
L nous eſt repreſenté ſous la figure d’vn ieune homme
veſtu d’incarnat, couronné de fueilles de cheſne,
& qui tient de la main droite le Signe du Scorpion,
& de la gauche vn pannier plein de neffles, de
champignons, de noix, de chaſtaignes, & d’autres fruicts ſelon
la ſaiſon.
Ce mois ayant eſté autrefois appellé Domitian, à cauſe de l’Empereur qui portoit ce meſme nom, ſe changea depuis par Arreſt du Senat, à cauſe des tyrannies de ce Prince, & reprit celuy d’Octobre, comme eſtant le huictieſme en ordre.
On l’habille d’incarnat, pource que le Soleil venant à decliner dans le ſolſtice de l’Hyuer, l’humeur des plantes commence à ſe reſerrer, ſi bien que leurs fueilles deuiennent de meſme couleur.
On luy fait tenir vn Scorpion, à cauſe qu’en ce mois-là le Soleil ſe treuue dans ce Signe, qui eſt appellé Scorpion, soit de la figure des Eſtoiles qui le repreſentent, ſoit de ſes effets. Car comme le venin du Scorpion eſt mortel à ceux qu’il picque, ſi l’on n’y met promptement remede, ainſi le Soleil eſtant dans ce Signe, produit des maladies tres-dangereuſes, à cauſe de l’inégalité du temps : d’où s’enſuiuent les langueurs du corps, ſelon Hypocrate, principalement lors qu’vn meſme iour eſt tantoſt chaud & tantoſt froid, comme il arriue en Automne.
Novembre.
A peinture eſt celle d’vn ieune Garçon veſtu de
couleur de fueille-morte, & couronné d’vne guirlande
d’oliuier. Il porte de la main droite le Signe
du Sagittaire, & de la gauche, vne Corne d’Abondance
pleine de diuerſes racines que la terre produit en ce
mois-là.
Le Signe Celeſte qu’on luy fait tenir eſt le Sagittaire, ainſi nommé tant de la figure des Eſtoiles, que de ſes effets : car en ce temps-là les pluyes & la greſle eſtant comme
