aux guerres ciuiles. On l’appelloit auparauant Sextil, pour eſtre le ſixieſme en ordre, commençant par Mars.
L’effroyable regard qu’on attribuë à ce mois, donne à connoiſtre combien il eſt dangereux, à cauſe qu’alors le Soleil ſe trouue dans la Canicule, dont la chaleur violente eſt nuiſible juſques au dernier point à la ſanté des mortels.
Le Signe Celeſte qui regne durant ce mois-là eſt appellé Vierge, pour monſtrer, que comme vne vierge eſt ſterile & n’engendre point, le Soleil de meſme ne produit rien en ce mois-là, & ne fait ſeulement que perfectionner & reduire en maturité les choſes deſia produites.
Pour ce qui eſt des fruicts qu’on luy fait tenir en main, ils ne ſont autres que ceux meſmes que la terre donna en ce temps-là à l’vſage des mortels.
Septembre.
L eſt peint en ieune homme qui a des aiſles, le viſage
riant, vn habillement de pourpre, vne belle guirlande.
Il tient d’vne main le Signe de la Balance, &
de l’autre vne Corne d’Abondance pleine de Raiſins
noirs et blancs, des Peſches, des Figues, des Poires, des Grenades,
& d’autres fruicts que produit ce mois-là.
Il eſt appellé Septembre, pour eſtre, comme i’ay dit, le ſeptieſme en ordre, ayant eu quelque temps auparauant le meſme nom de l’Empereur Germanicus.
On l’habille de pourpre, pour monſtrer que comme il n’appartient qu’aux Roys et aux plus grands hommes qui abondent en threſors de ſe parer d’vne ſi riche couleur, ce mois de meſme comme Prince de tous les autres, fournit en plus grande abondance que pas vn d’eux toutes les choſes qui ſont neceſſaires à l’vſage de la vie humaine.
Il porte le Signe de la Balance, à cauſe qu’en ce mois-là, c’eſtoit le meſme qui ſelon Virgile,
Du iour & de la nuict fait les heures eſgales.
