L’Eſtoile qui luit ſur ſon chef eſt celle que les Latins nomment Heſperus, qui ſe fait voir d’ordinaire en Occident vers le commencement de la nuict.
Il monſtre de la main droite l’endroit où le Soleil ſe couche, pour en marquer la difference d’auecque l’Orient, & faire voir par meſme moyen que le Soleil ne ſe couche pas pluſtoſt, qu’en ſuite de cela il faut neceſſairement qu’il nous priue de ſa lumiere.
Les Pauots qu’il tient de la main droite ſont les Symboles du ſommeil, qui eſt deſtiné pour le repos de la nuict. Ce qui nous eſt declaré par ce vers d’Ouide,
La nuict vient cependant de Pauots couronnée,
Et de ſonge enuironnée.
Il eſt enueloppé de Nuages ſombres, à trauers deſquels volent confuſément des Chauues-Souris, pource que la nuict s’approchant, l’air s’obſcurcit en meſme temps, & qu’on void alors paroiſtre ces animaux nocturnes.
Adjouſtons icy pour concluſion de ce dernier quartier du Monde, que l’ombre de l’homme qui le repreſente, le ſurpaſſe luy-meſme, pource que tant plus le Soleil s’eſloigne de nous, tant plus eſt grande l’ombre de tous les corps, puiſque, comme dit Virgile,
Par le Soleil couchant les ombres ſe redoublent.
